ਫਰੀਦਕੋਟ ਪੁਲਿਸ ਵੱਲੋਂ ਬੈਂਕ ਠੱਗੀ ਮਾਮਲੇ ਵਿੱਚ ਵੱਡੀ ਕਾਰਵਾਈ- ਮੁੱਖ ਦੋਸ਼ੀ ਅਮਿਤ ਢੀਂਗੜਾ ਦਾ ਸਾਥੀ ਗਾਜ਼ੀਆਬਾਦ ਤੋਂ ਗ੍ਰਿਫਤਾਰ

ਫਰੀਦਕੋਟ ਪੁਲਿਸ ਨੇ ਬਹੁ ਕਰੋੜੀ ਬੈਂਕ ਠੱਗੀ ਕੇਸ ਵਿੱਚ ਵੱਡੀ ਸਫਲਤਾ ਹਾਸਲ ਕਰਦਿਆਂ ਮੁੱਖ ਦੋਸ਼ੀ ਅਮਿਤ ਢੀਂਗੜਾ ਦੇ ਸਾਥੀ ਅਭਿਸ਼ੇਕ ਗੁਪਤਾ ਨੂੰ ਗਾਜ਼ੀਆਬਾਦ ਤੋਂ ਗ੍ਰਿਫਤਾਰ ਕਰ ਲਿਆ ਹੈ। ਜਾਂਚ ਦੌਰਾਨ ਖੁਲਾਸਾ ਹੋਇਆ ਕਿ ਅਭਿਸ਼ੇਕ ਨੇ ਠੱਗੀ ਦੀ ਰਕਮ ਨਾਲ ਗਾਜ਼ੀਆਬਾਦ ਵਿੱਚ 1.5 ਕਰੋੜ ਰੁਪਏ ਦਾ ਫਲੈਟ ਖਰੀਦਿਆ ਅਤੇ ਹੋਰ ਜਾਇਦਾਦਾਂ ਵਿੱਚ ਨਿਵੇਸ਼ ਕੀਤਾ। ਪੁਲਿਸ ਨੇ ਅਭਿਸ਼ੇਕ ਅਤੇ ਅਮਿਤ ਦੀ ਲਗਭਗ 2.5 ਕਰੋੜ ਰੁਪਏ ਦੀ ਚੱਲ-ਅਚੱਲ ਜਾਇਦਾਦ ਫਰੀਜ਼ ਕਰਨ ਦੀ ਪ੍ਰਕਿਰਿਆ ਸ਼ੁਰੂ ਕਰ ਦਿੱਤੀ ਹੈ। ਇਸ ਤੋਂ ਇਲਾਵਾ, ਅਭਿਸ਼ੇਕ ਦੇ ਬੈਂਕ ਖਾਤੇ ਤੋਂ 10 ਲੱਖ ਰੁਪਏ ਨਕਦ ਅਤੇ ਕਰੀਬ 10 ਤੋਲਾ ਸੋਨਾ ਜ਼ਬਤ ਕੀਤਾ ਗਿਆ ਹੈ। ਕੇਸ ਵਿੱਚ ਹੁਣ ਤੱਕ ਤਿੰਨ ਗ੍ਰਿਫਤਾਰੀਆਂ ਹੋ ਚੁੱਕੀਆਂ ਹਨ-ਅਮਿਤ ਢੀਂਗੜਾ, ਉਸ ਦੀ ਪਤਨੀ ਅਤੇ ਅਭਿਸ਼ੇਕ ਗੁਪਤਾ-ਜਦੋਂਕਿ ਦੋ ਹੋਰ ਸ਼ਖ਼ਸ ਵੀ ਪੁਲਿਸ ਰਾਡਾਰ 'ਤੇ ਹਨ। ਅਭਿਸ਼ੇਕ ਨੂੰ ਫਰੀਦਕੋਟ ਲਿਆ ਕੇ ਦੋ ਦਿਨਾਂ ਦੇ ਪੁਲਿਸ ਰਿਮਾਂਡ 'ਤੇ ਰੱਖਿਆ ਗਿਆ ਹੈ।